Португалија започна истрага против крајнодесничарски лидер поради изјави против Ромите

Португалското државно обвинителство покрена истрага против Андре Вентура, лидерот на крајнодесничарската партија Чега (Chega), поради контроверзни изјави во кои се дискриминира ромската заедница.

Истрагата следи по формална пријава од организацијата Letras Nomadas и уште девет други здруженија, во која се наведува дека Вентура, во видео-материјали од неговата изборна кампања, користел говор на омраза. Во едно видео, тој прашува: „Зошто градиме куќи за Цигани? Дали градиме за нормални луѓе?“ – изјава која предизвика остри реакции во јавноста.

„Ова е класичен пример на директна дискриминација и поттикнување омраза,“

изјави Бруно Гонсалвеш, потпретседател на Letras Nomadas. Тој додаде дека Вентура сам признава дека е свесен за можниот скандал што може да го предизвикаат неговите зборови, што според него го потврдува умислот.

Вентура, поранешен правник и спортски коментатор, ја формираше партијата Чега во 2019 година. Партијата застапува тврди десничарски и антиимиграциски ставови и бележи континуиран пораст на популарност. На изборите во 2022 година Чега стана трета најголема партија во парламентот, а на последните избори освои уште најмалку осум пратенички места.

Сепак, премиерот Луиш Монтенегро и неговата Демократска алијанса изјавија дека нема да коалицираат со Чега, поради екстремната реторика на партијата.

Истражувањето е во рана фаза, но според извори од обвинителството, можно е Вентура да се соочи со обвиненија за говор на омраза и дискриминација – дела што се санкционирани со закон во Португалија.