Puterdo o alusaribaskoro štabi ki komuna Šuto Orizari taro Sojuz e romengoro andar i Makedonija SRM

I partija Sojuzi e Romenge tari Makedonija, phravgja o centralno štabi ki komuna Šuto Orizari.

O kancelarije arakhljona ko drom Indira Gandi, ko than kote so ko nakhlutne 25 berša akaja partija kergja buti.

Ko utsavalo phravdipe e štabeske, sine o kandidati baš šerutno ki komuna Šuto Orizari o Asan Ferat thaj e dizjako šerutno taro Skopje o Petre Šilegov.

O lideri e partijako Gabriel Bajram, potenciringja kaj akava than sakana legargja baht e partijake thaj odoleske, akana sahno renovirimo, akatar ka keren buti em gndinela kaj ka legaren o triumf ko akala lokalnikane alusariba.

I Valentina Bajram, teloprezidenti ki partija SRM vakergja, so  akava than  ka ovel servis dži ko dizutne sebepi so o zoralipe si ko džijani thaj ola kerena agorutni decizija kaske ka den piro hango.

I partija SRM ko lokalnikane alusariba dela saporti baš o Asan Ferat, numaj isi olen thaj dendi korkorutni lista baš konsilidejbaskere džene baš o Konsili ki komuna Šuto Orizari.

Baši Eurompress

hramongja

Daniel Petrovski