Vasilica – Ljatif Demir

Kori e Roma uzal adava so isi religiakere bare divesa (save religiate si asavke religiakere bare divesa kerena) isi thaj tradicionalnikane bare divesa. Adala tradicionalnikane bare divesa si Vasilica, kerela pe k-o 14 januari thaj Herdelezi so kerela pe k-o 6 maji.

E Roma akala bare divesa kerena bas-i tradicia so achili olenge tar-e phureder thaj saj te vakerel pe kay avdive thaj nane Roma so saj te vakeren amenge soske kerena pe akala bare divesa. But fare akale bare divenge vakerela pe kaj si jekh e bare divenca so kerena thaj avera nacie adale divesende kana kerena pe thaj akala bare divesa. Numa, hari si pendzardo kaj akala bare divesa e Roma kerena adaleske so si ola phandle olengere cirlutne tradicienca.

O baro dive Vasilica e Roma kerena bas-i paramisi so generacienca nakhel jekh averestar maskar olende, a adale legendate vakerela pe so e Roma an-o cirlutno vahti, kana nasena sine tar-o terori e manusengoro so mangena sine te mudaren olen, avile dzi Baro Pani thaj jekhutno drom te ikloven akale situaciatar sine te hulen an-o pani thaj te nanjoven dzi aver phuvakoro than. Numa, adaleske so pobaro kotor olendar sine dzuvla, chave thaj phure so na dzanena te nanjoven ko pani sine baro riziko te tasloven.

Ko adava vahti o Devel te saj te ikalel olen akale situaciatar mukhla sine olenge papina so ikalde olen tar-o taslovipe thaj ingarda sine olen dzi aver phuvakoro than. Adale cirlutne Devleskere lachipaske, sakova bers e Roma kerena i Vasilica sar olengoro tradicionalnikano baro dive. Adale diveste ola sikavena plo baro pacavipe kori o Devel thaj baro respekti kori papin.

Tradicia si sakova bers ko 12 januari te chinen pe e papina thai dzi 14 januari olengere khereste te na avel nijekh manus savo so nane dzeno adale familiatar (but fare adalenge so vakerasa akaja paramisi pucena amen soske e Roma chinena e papinen so cirlutne vahteste ikalde olen. Sar so vakerela i romengiri mitologia but fare arakhena pe asavke pacavipa kaj e Roma chinena e papinen bas-o adava te ikalen olendar o vilo thaj bukho k-e tradicionalnikane adetia te saj te achovel i baht so nekana sine e Roman pale maskar olende. Akava adeti kerela pe k-o dive kana chinena pe e papina kana i familia kerela habe kerdo salde e papinakere vilestar thaj bukhestar).

Javinate, k-o 14 januari i familia thaj o kher so kerela o baro dive Vasilica, phravela e khereskoro vudara thaj adale khereste jekhto hulela manus so maskar e Roma si pendzardo sar polazniko (adava manus angleder adava si pendzardo e familiake, e familiakoro serutno vakerela kon ka ovel adava manus thaj pacala pe kaj vov anela baht thaj sukar hali). Adaleske vov peja anela love thaj giv thaj kana hulela andre vov chudela olen upre vakerindo: Te ovel tumenge bahtali i Vasilica. O Devel te del tumen baht, sastipe thaj vestipe. Akava bers pohari, dzi berse pobuter.

Anglo polazniko chivela pe habe, pibe, a sar specialiteti dela pe pe oleske paca so si kerdi tar-i sir thaj papinakoro sero, men, pakha thaj pire. I paca kerela pe but adetenca thaj si phari keripaske. Kana vov ka sudrol tar-o panialo ovela zoralo habe. Akava olakoro ovipe tar-o panialo k-o zoralo habe isi ole simboli so e Roma iklile tar-o Baro pani thaj avile dzi phuvakire thana.

Majanglal i paca tatinela o polazniko, a pala adava e khereskoro serutno. I paca si simboli bas-o baro pacavipa kori papin so an-o cirlutno vahti ikalda e romen ma te tasavdoven k-o Baro pani. Palo polaznikorosko iklovipe e kherestar, adale khereste saj te aven sa e pase familiakere dzene thaj amala te saj te bahtakeren pumenge o baro dive. Kana kerena akava baro dive, e Roma organizirena pe k-e grupe thaj sa e grupe dzana kherestar k-o kher te bahtakeren o Baro dive¡, tatinen e pacatar te han thaj pien.

Akaja organizacia si adaleske so i tradicia thaj o pacavipa vakerela so kamla pe e Roma te oven phandle e papinakere ruhea thaj te arakhen pumaro jekhipe. Akava baro dive e Roma kerena 4 dive.

Lendo istorijati prekal o linko