Kolumna – Erdjan Demir “Dji keda agjhare?”

Dikava em nashti verujnava odova so dika, dali cace ili na.

Korkori man pucava ki koja nasoka djaja, koj sa vodinela amen, isi li nesavo plani, so em sar ka prevzeminelpes.

Dali amare o manusha so momentalno vodinena amen tane Nacionalistija ili Egoistija, kerelapes okova so trebela ili koj sar so mangela.

Djanena li akala manusha soj strategija, vizija ili dikena samo o proektija em o provizije taro tenderija. Shungje li akala mnusha bashi o lafi PRIORITET em so odova znacinela.

Ki sred pandemija, koga ki drzava isi proglasimi krizno sostojba, soocinaja amen sarine e sastipaskere krizaja koja so pali peste cidela thaj ekonomsko kriza, koga ki amari komuna naj Investicije, isi amen but problemija.

Zivinaja ko XXI veko kalendarsko a ko relanost sijam but popalal.

Isi amen familije kola so panda zivinen ko inprovizirime khera, negdeka panda saglami ulice naje a ote da kote so isi pherde dupkencar pa nashti peshki te nake a kamo li vrdaja, panda o problemi e fekalno kanalizacijaja naje reshimoo manusha jame isi len ko khera. Mate kera lafi bashi i atmosfersko kanalizacija keda dena pobare brshima djanaja ko so licinena amare droma, ka phene ki Venecija sijam.

Za te ave ki pozicija trebela tu i podrshka em i doverba e narodostar, za odova te dobine trebela nesave bukja lenge te obecine kaj tu neshto ka kere em odova te ovel shukar pobare grupake. Pali odova koga ka beshe ki fotelja na trebela te bistre odova so obecingjan em kaskoro sebepi tu sijan ote, za zal dji akana isiamen loshno iskustvo akale bukjaja.

Sar shaj odobor sigate te bistre odova, te kere samo sar tu mangeja, tu sar mislineja em tuke te ovel majshukar.

E narodo delino kereja kaj tu sijan o najshukar, kaj tu sijan o naj bukjarno, kaj tu sijan o najdjando panda nadjanava so. Taro odova soj lenge but shukar, taro o shukaripe sar te phene bistrena kaj o vreme thavdela, kaj sekoja pozicija ili funkcija isila piro mandatai/vreme ama stalno alngleder o krajo osvestinenape ovena sar i mecka koja ushtela taro evendeskoro sojbe.

Trin bersh tekvash pi bul na mrdingje, edvaj nekde jek shajka kuvgje, pe bukja sa ko than ange, pe djepe phergje i akana ko krajo dengjepe godi e narodoske. Zarem mislinena so o narodo odova na dikela, mislinena kaj o narodo odova tumenge oprostinela, kotar e narodo hovavena akana pocminena korkori tumende da te hovaven. Trin bersh tekvash na kerdilope nishto akana shove masekonge ka keren sa kashta, palme, lulugja, car ka sadinen.

Savi magija odoja, save magijonicharija sijen. Za tumen te bistren tumare tezge pipereja patlidjaneja em te aven ko vile em tumare privatna zoloshke trebingja tumen trin bersh tekvash a e narodoskere bukjenge samo shov masek.

Agjhare li tume kerena buti bashi poshukar djivdipe e narodoske, ama prvo tumaro, tumare najpashengoro a e narodoskoro majpalal. Tumen so beshena ko odola fotelje prodolzinen te keren buti agjahare ama ma bistren so nishto naje vecno, sekole bukja isila po krajo.

A o narod te mislinela kaj sa akava shukare, kaj asavke principencar amen sa zaednica ka dja angle bujrum palem neka podrzinen asavken.

Erdjan Demir

Presidenti taro Komunakoro ogranok

 VMRO-DPMNE Shuto Orizari

O stavi taro kolumnisti nane stavi taro Euromapress