Kolumna : „Ki romani sakanutni scena khelin, intrige…“

Pheraja li amaro romano čalipe pohari, instaliribaja manušen ko themutne institucije avrijal taro romane politikakere partije?

So džanava, šaj oja šaj na, numa soske te na kana nanejamen zorale politikakere liderija. tega o udara baši e romane bi guvermenteskere asocijacije si phravde te len o thana ko themutne institucije.

Kozom taro romane političarija pherena piro čalipe so ko angleder duj dive jek than ki themutni institucija sar so o Ministeriumi baši o hakaja ko than sekretari ko akava ministeriumi si čivdo o Muhamed  Toči, presidenti tari romani NGO „Mesečina“Gostivar?

Me personalno na pendžarava e Toči, džanava sa so ov si bute beršengoro presidenti ki NGO „Mesečina“.

Prekal mire pendžarde kola so si paše lesa ano NGO, thaj biznis relacije, resena but pozitivnikane informacije, na baši leskiri buti keribe ko NGO sektori numa ko leskoro educiribe, leskoro oratortsvo, kontaktija thaj sar romano reprezenti.

O Toči si diplomirimo jurikditari thaj ko jekh magisteri pi jurisdikcija.

Super, čalipe, startujnena edukativno manuša kola so avrijal taro politikakoro maribe kuvena ko asavke thana kola so si importano baši i romani jekhin kana kerelape lafi baši lakoro siguriteti ani Utarali Makedonia, kote so ko nakle duj berša čipotingjepe nekobor bukja upreder e Roma, kola so vi avdive rodena pire hakaja ano makedoniakoro tribunali.

Džanaja savore sar kuvgja o Toči ki akaja pozicija, džanaja savore kaj ov kuvgja prekal o urgencie tari piri tetka i Ljatifa Šikovska so si aktuelno deputati ano Makedoniakoro Parlamenti.

Očiglednoi si, so vi sar leskiri  tetka so  kuvgja  ano učo than ani lista baši kandidatija ko palune Parlamentarna alusaribe tari gadžikani partija SDSM, vi so nane dizutni tari akaja Komuna, a lake kergje buti maltene sasto romano elektorati tari alusaribaskiri jekhin i dujengiri te ovel oj avdive reprezenti e romengioro ani Makedonia.

Džanaja vi so i aktuelno misniterka baši edukacija i Mila Carovska kergja bare urgencije mujal sa okola vavera kandidatrija tari dujengiri alusaribaskiri jekhin te ikave la  deputati, odoleja so sine čivdi ko učo than ki lista taro kandidatija taro SDSM tari akja alusaribaskiri jekhin. 

Nejse, soske baš o Toči kova so avela taro Gostivar te ovel predložimo taro Komunakoro ogranok SDSM Šuto Orizari, savi si o panlipe Šuto Orizari ‚ Gostivar, soske na sine predložimo taro ogranok e SDSM-oskoro taro Gostivar, soske na o gadžikano ogranko te predložinel Rome. ki akaja čipota e Toči?

Na, nanema nisavo mujalipe prekal o Toči, me samo pučava, a koj pučela našti našavgovela, nali agjar o phure vakerena.

Nane li ani Komunakoro ogranok SDSM Šuto Orizari educirimo manuš kova so ka pherel e ogranokoskre thaj vi agjar e partijakere SDSM o apetitija.

Soske si akava ogranok kana na šaj alusarinela nekas tari akaja Komuna kana kerelape lafi leskiri andi decizija?

But pučiba , numa sijum ki gnd so na ka oven dende džovapia.

Palo akava palem ka ovav atakujmo, soske o poblemi sar koj dikela si sar ani medicinakiri laboaratorija, o laboranti dikelale prekal o miskroskopi, a avrijal tari labarotorija na dikelape nit prekal i bari lupa.

Me palem na ka ovav romano patrioti, sebepi so neko ka vakerel , dikaja te čiva manušen romen bizi diferencija kotar avela. E, oja čače vakerena ki politika niked nane jekh rig, ni sar ki prostituka jekh murš.

Sare tej bahtasa o nevo than e Točiske, thaj e NGO asocijacinege, a baši o romane političko liderija meninen o kursi, but sig ka ačon čuče vastencar.