Pana 61 džene deportuime kotar Hanover ani Srbia thaj Šudririgaki Makedonia, dži kaj anglo odova kerdi kolektivno deportacia kotar Baden – Vurtemberg ano solduj phuvja.
Kotar o Hanover evakuišime e manuša e averutne raštrenda, familie e tikne čhavenca, terne manuša save pherde dešuohto berša. But maškar on siton džene romane sojeske.
Germaniako sajt Ran mothavela kaj deportuime duj romane čhave, bijande ano Getingen. E policia astarga olen thaj anga ano aeroporti thaj odota e aeroplanea bičhalde ano Beogradi. Odole momentesta mukle siton sa kokore te arakhenpe.
Angle odole vaktesta na sine ulavde para familiata, savi ačhili dur e đivdipa ano Getingen.
Dešuohtoberšengi Romanica, bijandi ani Teluni Saksonija, našti e deportaciata soske na sine khere kana e policia rodinga ola kote bešela.
Deportacia ani Srbia, Šudririgaki Makedonia thaj ano Kosovo rndono ovela ini kaj si kriza e pandemia virusea korona, hraminela germaniako sajti Ran.
But deportuime Roma kotar e Germania, našutne siton kotar e nakhli Jugoslavia, a majbut našle ano mareba savo sine ko 90. berša, jase tradime kotar o Kosovo.
Si but situacie e čhavenge save bijande jase barile ani Germania pere familienca te oven r tradimepozo ani phuv savu ni na pindžarena a ni na vakarena olengi čhib.
Ano odola phuvja nanolen poro kher. Odoleske on dikhena te inarenpe popale ani raštra kotar deportuime jase ano than kote haćarena kaj olengo sito.
Duj dešuohtoberšenge romane phrala kotar e Germania, darana e rizikosta kaj ka oven deportuime.
E policia već vizitinga olen e manglipa te tradol olen ani Srbia, ulaviba olen e biološko familiata. Ini kaj na sineton khere kana e policia ali te len olen, akana siolen riziko kaj ka ingaren olen ano phanibe varesave thaneste te arakhen olen.
„Me phrale than mande mangena te deportuinen ani Srbia, ani phuv kote na džana olengi čhib ni e kultura.
Ani Srbia nane amen nikaste e familiata. Amare plania ano avutnipe phando sito vaš e Germania, vakarena po pharipe akala romane phrala thaj phenena kaj siolen manglipe te vakaren e psihologea, soske, sar vakarena, olenge manušikane hakaja peravde siton sebepi sajekh tradipe e policiako.
„Si amen baro stresi. Sajekh haćara dar, depresia, astarela amen e panika, na džana so te kera, savo sito akava đivdipe“, mothavena on.
Odova so pana uškavela akaja situacia sito o fakti kaj deportacie ovena ano maškar e bilačhi sasljaribaski situacia kerdi e korona virusea.
Una Beriša
Discover more from EU Romapress
Subscribe to get the latest posts sent to your email.
