So garavelape palo ko plani buvlardipe e dromeske Džon Kenedi so ka nakhel tari romani mahala ani Skopje?

O buvljaripe taro drom Džon Kenedi kova so ka trebel te nakel prekal i romani purani romani mahala jali

pendžardi sar Teneke mahala, palo ko dobor berš ka startujnel te realizirinelpe.

Baši relizacija akale proekteske ka trebel te peravenpes paše 30 kera.

Ko akava momenti tari diz Skopje havljarena so  akale proekteja ka keren posigarutno trafikakoro protokoli.

Numa jali akava talo o čačutno čaipa?

Ki vrama kana i amerikansko ambasada sine agorkerimi e thamaribaja, i Komuna Čair maškar kote perela i romani mahala, ki vrama kana o Izet Medžiti sine šerutno ki akaja Komuna sine plani kompletno te peravenpes e romane khera ani akaja mahala, a lenge te kerenpes kera ki Komuna Šuto Orizari ko kotor so džala ko Vizbegovo.

Tega ki adaja vrama i Komuna Šuto Orizari prekal pire bukjarne mukle probno baloni ko dizutne tari akaja mahala kola so sig dengje mujalipe baši bilo savo plani lengere delogžacijakoro tari lengiri mahala , thaj agjar akava plani na sukcesingja, anglo sa so but khera odotar si but purane thaj isilen tapija panda tari khorani vrama.

I ideja sine ko akava than e mahalaleke te kerenpes urbanistikano than dživdipaske, kova so na ka ladžarel i diz Skopje, sebepi so ki amerikansko ambasada avena but VIP manuša thaj jabandžisko delegacije, thaj o drom so nakela paše tari akaja mahala si direkno panlo e aeroporteja Petrovec.

E akana o pučibe si jali akavva plani ka sukcesinel sar avgo etapa, prekal o buvljaripe sal o drom , kote so ka oven peljarde nekobor khera, thaj palo odova ka vel i dujto etapa thaj i trito, pohari te peravenpes okola da khera tari sasti romani mahala, sar bi realizirinelape akava proekti kerdo anglo nekobor berša.
Vi agjar si o pučiba, kote ka thanaren e manušen kaskere khera ka peljaren, jali ka kerelpe ki Komuna buvljardo romano geto, jali akava ka ovel polačeste e romenge te oven khedime ko jekh than… sar tej akaja ideja nane lači, sebepi o istorisko kotor panlo e romencar ko formiribe i avgo romani kolonija ani diz Skopje.