Isi amen chest te pretstavina tumengje o intervju e legendarno romane boksereja – Veli Mumin. Ko amaro kratko intervju postavingjem leske nekobor puchiba kola so i phanle e sporteja thaj javere temencar. Uzivinen ko intervju.

1. Koj sine o prvo manush so pendjargja tiro talenti basho Boks?

VM: O prvo manush so pendjargja miro talenti tano Ruzdija Kalac profesori ko fakulteti bashi fizicko kultura.

2. Kova sine tuke o najlokho, a kova najpharo natprevar ki kariera?

VM: Ko Boks nane lokho hem pharo mec, sa zavisinela tari fizicko thaj psihicko spremnost.

3. Sar uspejngjan te spravine tut e diskriminacijaja, koja za zal khugja hem ko sport?

VM: I Diskriminacija tani za zal sekojdnevie amende, osobeno koga trebela Rom te ovel unapredimo sar zasluzeno rabotniko. Za zal o Roma vrtinena pe ko than, shaj nane dovolno motivirime te “maren” pe basho unapreduvanje, soske tane omalovazime hem dikriminirime taro sekova aspekti. Basho primer mande ki Agencija za mladi i sport isi man kolega Rom prof. basho fizicko obrazovanie, magister bashi avruni hem andruni politika thaj inspektori basho sportska bukja 15 bersh. Hem shaj vakerava deka tano jek taro najpametna manusha ki institucija!

4. Dali adava so sijen uspeshno Bokseri thaj dali tumare bokserska vestine, pomozingje tumen hem avrial taro ringo te anen avtoriteti thaj te dobinen pocit taro javera manusha?

VM: Oja, normalno deka o uspeh sar sportisti isi le leskoro benefit. Korkori o Boks tano but pharo hem but hari manusha probinena te trenirinen akava sport. Isi le hem shukar hem loshna strane akale sporte. O shukar bukja tane: dobineja navika basho Sport, fizicko hem psihicko spremnost bashi bilo savi situacija ko zivoto, gradineja empatija thaj solidarnost prema o sportisti, dobineja etika hem morali bashi pobeda hem but javera osobine.

5. Koj prema tumende tano najshukar bokseri ki istorija?

VM: Najshukar bokseri sa e vremengje tano o Muhamed Ali kova soj tano proglasimo sportisti e Mileniumeskoro, ama sepak akate tane o M. Tyson, Roy Jones Jr. Ko ponevo vreme o Tyson Fury kova tano Romani gordost.

6. Omileno sport, uza ko Boks? Ako NBA ili Fudbali – kaske navinena hem koj tumaro omileno igraci?

VM: Navinava sekogash e fudbalsko reprezentacijake tari Makedonija, cestitke bashi o plasman ko EURO 2021.

7. So bi preporacineja e neve generacijenge kola so planirinena te zaniminen pe akale sporteja?

VM: Koga veke ka zamangjen o Boks, za da te oven uspeshna bokserija mora te trenirinen taro 7 dzi 8 saatija ko dive. O Uspeh avela korkori pestar.

Total Views: 53 ,
Translate »