Evropaki drakhin e romane organizaciengi thaj o džene kotar čehiako civilno sektori bičhalde putardo lil e čehiake ministreske marketesko thaj industriako Karel Havliček ano savo rodena olesta te dol informacie kotar Nacionalno plani vaš pošukar đivdipe thaj te dol đevapi kotar pučipe: sar romane reprezentatoria šaj te oven aktivno thaj te len kotor ano keribe e Nacionalne planesko?

Ano putardo lil sikavdo bajo sebepi fakti kaj e Thagarutni nijekh drom na akharga reprezentatoria e romane civilno amalipaske jase čehiako thagarutnako Šerutnipe vaš pučipe e romane minoritetengo te ovol olen buti ano keribe Nacionalno plani vaš lačharibe.

„Odova manglape te ovol majzoralo stimulativno paketi vaš finansiako ažutipe ani istoria e Čehiaki thaj te ovol sar ažutipe kotar nevi kriza kerdi koronavirusea“, phendilo ano lil pana vakardo kaj manglino finansienca te ažutinolpe edukuibe thaj marketia e bukenge, rodipe, te ažutinolpe barjaripe thaj inovacie, digitalno transformacia, sar ini sastipe thaj imuniteti e dizutnengo.

Reprezentatoria e romane organizaciengo rodena akava pučipe kotar o Roma te lolpe ano Nacionalno plani vaš ažutipe, soske gendja kotar lokalno niveli sikavena kaj e pandemia koronavirusea zorale prminga đivdipe e but Romengo thaj zorakarga olengo socialno biintegrišibe.

Nacionalno plani vaš lačharibe e Čehiaki Republika manglape te dol e Evropaka komisiake dži agor e martesko akale beršesko.

Total Views: 64 ,
Translate »